Müğənni Rəqsanə İsmayılova barəsində seçilmiş həbs-qətimkan tədbirindən apellyasiya şikayəti verib. Bu barədə onun vəkili Hikmət Əliyev məlumat yayıb.

Bir neçə gün əvvəl dələduzluq ittihamı ilə saxlanılan sənətçi məhkəmənin qərarı ilə 4 ay müddətinə həbs olunub. Vəkil deyir ki, İsmayılovanın azadlıqda qalması nə cəmiyyət üçün təhlükə yaradır, nə də istintaqın gedişinə mane olur:

“Rəqsanə İsmayılova özünü təqsirli bilmir. Əgər hər hansısa şikayət varsa, onun araşdırılması başa düşüləndir. Lakin bu araşdırmanın müğənninin azadlıqda olarkən aparılması daha ədalətlidir”, – deyə vəkil qeyd edib.

Şikayətə iki gün ərzində Bakı Apellyasiya Məhkəməsində baxılacaq.

Müğənni avqustun 16-da saxlanılıb. İttihama görə, o, iki nəfərə məxsus ümumilikdə 35 min manatlıq qızıl-zinət əşyalarını və 520 min ABŞ dolları məbləğində pulu ələ keçirib. İstintaqın təqdimatı əsasında məhkəmə onun barəsində həbs-qətimkan tədbiri seçib. Cinayət Məcəlləsinin 178.4-cü maddəsi (xüsusilə külli miqdarda dələduzluq) ilə ona 14 ilə qədər azadlıqdan məhrumetmə cəzası verilə bilər.

Rəqsanə İsmayılova daha əvvəl sosial şəbəkələrdə Xəzər Rayon Polis İdarəsinin rəisi Əli İbrahimovla yaşadığı mülkiyyət mübahisəsinə görə daxili işlər nazirinə müraciət etmişdi. Sosial mediada onun həbsi də məhz bu münaqişə ilə əlaqələndirilir.

Müğənninin həyat yoldaşı Fazil Mustafayev isə Rusiyanın Azərbaycandakı səfirliyinə müraciət edib. O, özünün və övladlarının təhlükəsizliyinin təmin olunmasını istəyərək belə yazıb:

“Mən bir Rusiya vətəndaşı olaraq səfirlikdən kömək istəyirəm. Mənim və övladlarımın təhlükəsizliyini təmin etsinlər, ölkəmə geri göndərsinlər. Burada əlimdən heç nə gəlmir”.