Gürcüstanın müxalif “Axali” partiyasının həbsdə olan həmsədri Nika Meliya məhkəmə zalında hakimin üzərinə su atdığı üçün 1 il 6 ay müddətinə həbs cəzasına məhkum edilib.

Bu barədə məlumatı “Civil.ge” yayıb. Hökm noyabrın 26-da Tbilisi Şəhər Məhkəməsində elan olunub.

Hadisə bu il mayın 30-da baş verib. Məhkəmə prosesində çıxış edən Meliya hakimin onun nitqinə diqqət yetirmədiyini iddia edərək, su dolu stəkandakı suyu hakimin üzərinə atıb. İnsidentdən bir gün əvvəl — mayın 29-da o, başqa bir cinayət işi üzrə saxlanılmışdı.

Meliyanın su atdığı insidentlə bağlı məhkum edilməsi onun barəsində açılmış növbəti cinayət işinin nəticəsidir.

Müxalifət liderinə qarşı digər ittihamlar

Bundan əvvəl Meliya parlamentin istintaq komissiyasının iclasına getməməsinə görə məsuliyyətə cəlb olunmuş, lakin həbs edilməmişdi. O, girov müqabilində azadlıqda qala bilərdi, lakin girovu ödəməkdən imtina etdiyi üçün mayın 29-da azadlıq müddəti başa çatdıqdan sonra saxlanılıb.

Bu iş üzrə ona iyunun 27-də 8 aylıq həbs cəzası verilmişdi.

Gürcüstanda digər müxalif liderlərin də həbsi davam edir

Hazırda Meliya ilə yanaşı, bir neçə tanınmış müxalifət lideri də müxtəlif ittihamlarla həbs olunub:
• Nika Qvaramia, Zurab Caparidze və Giorgi Vaşadze – parlament komissiyasını boykot etdiklərinə görə
• Elene Xoştariya – Tbilisi meri Kaxa Kaladzenin posterinə “Rus Arzusu” yazdığı üçün
• Mamuka Xazaradze və Badri Caparidze – komissiyanı boykot etdiklərinə görə (sonradan prezident tərəfindən əfv ediliblər)

Noyabrın 6-da isə bu müxalifət liderlərinə qarşı “dövlət əleyhinə cinayətdə iştirak” ittihamı ilə yeni cinayət işi açıldığı bildirilib.

Gürcüstanda müxalif siyasətçilərə qarşı ard-ardına həbs qərarlarının verilməsi ölkədə siyasi gərginliyi daha da artırır.