Xankəndidə sentyabrın 14-də baş verən terrora cəhd hadisəsi ilə bağlı başlanmış cinayət işi üzrə ibtidai istintaq yekunlaşıb. Baş Prokurorluğun Mətbuat Xidməti məlumat verib ki, iş üzrə toplanmış materiallar baxılması üçün Gəncə Ağır Cinayətlər Məhkəməsinə göndərilib.

İstintaqla müəyyən edilib ki, Xankəndi şəhərinin erməniəsilli sakini, 1967-ci il təvəllüdlü Karen Avanesyan ictimai təhlükəsizliyi pozmaq və əhali arasında vahimə yaratmaq məqsədilə terrorçuluq əməli törətməyə cəhd edib. O, 2023-cü ilin sentyabr ayına qədər şəhərdə fəaliyyət göstərmiş qanunsuz silahlı birləşmələrdən qalmış “AKMS” markalı avtomat, onun hissələri və çox sayda əl qumbarası əldə edərək gizlədib.

Sentyabrın 14-də səhər saatlarında yaşadığı sosial sığınacağı tərk edən Avanesyan silah-sursatı götürərək yaşayış olmayan evlərdən birinə keçib və polis əməkdaşlarına qarşı terror aktı törətmək məqsədilə mövqe tutub. O, polis əməkdaşlarının yaxınlaşdığını gördükdə avtomatdan çoxsaylı atəş açıb, daha sonra isə əl qumbaraları ataraq partlayışlar törədib.

Hadisə nəticəsində üç polis əməkdaşı müxtəlif dərəcəli bədən xəsarətləri alıb, onlara vaxtında tibbi yardım göstərildiyi üçün həyatlarını xilas etmək mümkün olub.

Qanuni tələblərə tabe olmaqdan imtina edən Avanesyan polis tərəfindən odlu silah tətbiqi ilə zərərsizləşdirilərək saxlanılıb və daha sonra xəstəxanada müalicə edilib.

Toplanmış sübutlara əsasən o, Azərbaycan Respublikası Cinayət Məcəlləsinin:
• 29, 120.2.3; 29, 120.2.4; 29, 120.2.7; 29, 120.2.11 (iki və daha çox şəxsi terrorçuluqla əlaqədar qəsdən öldürməyə cəhd),
• 214.2.3 (odlu silahdan istifadə etməklə terrorçuluq),
• 228.1 (qanunsuz silah əldə etmə və saxlama),
• 315-ci (hakimiyyət nümayəndəsinə qarşı müqavimət və zor tətbiqi)

maddələri ilə təqsirləndirilən şəxs qismində cinayət məsuliyyətinə cəlb olunub.

Xankəndi Şəhər Məhkəməsinin qərarı ilə onun barəsində həbs qətimkan tədbiri seçilib.

Cinayət işi tamamlanaraq baxılması üçün Gəncə Ağır Cinayətlər Məhkəməsinə göndərilib.