Qusar rayonunda gecə saatlarında qadının evinə gizli şəkildə gələrək ona qarşı nalayiq hərəkətlər edən şəxs cəzalandırılıb. Hadisə Aşağı Ləgər kəndində baş verib.

Məlumata görə, 35 yaşlı Oruc Qasımov (ad və soyad şərtidir) saat 23 radələrində qonşusunun hasarından aşıb, evə qanunsuz daxil olub. O, ev sahibəsini yatılı vəziyyətdə görərək əvvəl alnından öpüb, sonra isə çiyinlərindən tutaraq oyatmaq istəyib. Qadın oyanaraq qışqırıb və onu əvvəl süpürgə, daha sonra isə tava ilə vuraraq evdən uzaqlaşdırıb.

Hadisədən sonra Oruc Qasımova qarşı Cinayət Məcəlləsinin 157.1-ci maddəsi (mənzildə yaşayanın iradəsinə zidd olaraq mənzilə daxil olma) ilə cinayət işi açılıb.

Tərəflərin ifadələri

Təqsirləndirilən şəxs məhkəmədə bildirib ki, hadisə zamanı sərxoş olub və həmin evə guya yük daşımağa kömək etmək üçün girdiyini zənn edib. Daha sonra öz evinə qayıtdığını və həyətdə yatdığını iddia edib.

Zərərçəkən qadın isə bunu təkzib edib:

“Heç kimi köməyə çağırmamışdım. Gecə qəfil evimə girdi. Alnımdan öpüb, çiyinlərimdən tutdu. Qışqırmamağım üçün boğazımı sıxdı. Özümü müdafiə etmək üçün süpürgə ilə vurdum. Sonra tavanı sifətinə endirdim.”

Şahid ifadəsinə görə, Oruc Qasımov ailəlidir və üç övladı var. Qadının qışqırığı zamanı uşaqlar qorxudan ağlayıblar.

Məhkəmənin hökmü

Qusar Rayon Məhkəməsinin qərarı ilə Oruc Qasımovun barəsində elektron qolbaq tətbiq olunub və o, 480 saat ictimai iş cəzasına məhkum edilib.

Hadisə ilə bağlı araşdırmalar başa çatıb.