Sumqayıt şəhərində 18 yaşlı gəncin meyiti aşkarlanıb. Hadisə şəhərin 30-cu məhəllə adlanan ərazisində qeydə alınıb.

Məlumata görə, 2007-ci il təvəllüdlü Fəttayev Müşfiq Mirmehdi oğlunun cansız bədəni yaşadığı evdə yaxınları tərəfindən tapılıb.

Bildirilir ki, vəfat edən gənc Klassik Xalq Cəbhəsi Partiyasının (KXCP) sədri, sabiq deputat Mirmahmud Mirəlioğlunun nəvəsidir. Onun atası Mirmehdi Fəttayevin iki övladı olub. Böyük oğlu Müşfiq Fəttayev 18 yaşında idi, kiçik övladı isə məktəblidir.

İlkin məlumata görə, gəncin ölümünə ürək tutması səbəb olub. Hadisənin dəqiq səbəbləri aidiyyəti qurumlar tərəfindən araşdırılır.

Qeyd edək ki, Mirmahmud Mirəlioğlu ailəsində bundan əvvəl də itkilər baş verib. O, 1991 və 2009-cu illərdə oğulları Müşfiq və Mircəlili, 2012-ci ildə isə qızı Mahirəni itirib.