Şri-Lanka sahilləri yaxınlığında İran Hərbi Dəniz Qüvvələrinə məxsus IRIS Dena adlı hərbi gəminin batması nəticəsində azı 80 nəfərin öldüyü bildirilir.

Bu barədə Şri-Lankanın xarici işlər nazirinin müavini yerli televiziya kanalına açıqlamasında məlumat verib. Hadisənin Hind okeanında baş verdiyi qeyd olunub.

Şri-Lanka Hərbi Dəniz Qüvvələrinin nümayəndəsi daha əvvəl gəminin sənədlərinə əsasən göyərtədə ümumilikdə 180 nəfərin olduğu ehtimal edildiyini bildirib. Şri-Lanka donanması fövqəladə siqnal əsasında həyata keçirilən xilasetmə əməliyyatı zamanı 32 nəfəri sudan çıxara bilib.

Rəsmi rəqəmlər təsdiqlənərsə, hazırda onlarla şəxsin taleyi naməlum olaraq qalır.

Sualtı qayıq hücumu iddiası

Xarici KİV-in məlumatına görə, Şri-Lanka sahillərində İran gəmisinə sualtı qayıq hücumu olub. Zərbədən sonra azı 101 nəfərin itkin düşdüyü, 78 nəfərin isə yaralandığı bildirilir.

Şri-Lankanın müdafiə nazirliyi adanın təxminən 25 mil cənubunda batmış gəminin digər heyət üzvlərinin axtarışının davam etdiyini açıqlayıb.

Şri-Lankanın xarici işlər naziri Vajitha Herat parlamentdə çıxışı zamanı yaralı dənizçilərin adanın cənubundakı xəstəxanalara yerləşdirildiyini deyib.

Məlumata görə, İranın Cənub Donanmasına məxsus “Moj” seriyalı freqat səhər tezdən təcili yardım siqnalı verib. Hadisənin dəqiq səbəbləri ilə bağlı araşdırma aparılır.