İran Prezidenti Məsud Pezeşkian ABŞ ilə əldə olunan tarixi anlaşma memorandumunu imzalayıb.

İranın dövlət xəbər agentliyi IRNA tərəfindən yayımlanan fotolarda Pezeşkianın fars dilində hazırlanmış memorandumun nüsxəsini imzaladığı əks olunub. Sənəddə həm İran Prezidenti Məsud Pezeşkianın, həm də ABŞ Prezidenti Donald Trampın imzalarının yer aldığı bildirilib.

Məlumata görə, Donald Tramp memorandumun çap olunmuş nüsxəsini Fransanın Versal şəhərində imzalayıb. Daha sonra imzalanmış sənədin fotoşəkli İran tərəfinə göndərilib və Tehran tərəfindən də rəsmən təsdiqlənib.

Təxminən 800 sözdən ibarət olan və 14 maddəni əhatə edən memorandumda atəşkəsin genişləndirilməsi, Hörmüz boğazında beynəlxalq gəmiçiliyin bərpası, eləcə də tərəflər arasında gələcək danışıqların davam etdirilməsi ilə bağlı müddəalar yer alıb. Sənədin əsas məqsədi Vaşinqton və Tehran arasında gərginliyin azaldılması və uzunmüddətli siyasi razılaşma üçün çərçivənin yaradılmasıdır.

Münaqişə dövründə vasitəçi rolunu oynayan Pakistan hökuməti memorandumun dərhal qüvvəyə mindiyini açıqlayıb. Pakistan rəsmiləri sənədin bölgədə sabitliyin bərpası istiqamətində mühüm addım olduğunu vurğulayıblar.

Qeyd edək ki, memorandum yekun sülh sazişi hesab olunmur. Tərəflər qarşıdakı 60 gün ərzində nüvə proqramı, iqtisadi sanksiyalar və regional təhlükəsizlik məsələlərini əhatə edən daha geniş razılaşma üzərində danışıqları davam etdirməyi planlaşdırırlar.