8
ABŞ Prezidenti Donald Tramp Fransaya səfər edib və burada keçirilən “Böyük yeddilik” (G7) sammitində iştirak edir. Sammit iyunun 15-17-də Fransanın Evian-les-Ben şəhərində keçirilir.

Beynəlxalq mətbuatın diqqət mərkəzində Trampın sammitə İranla bağlı açıqlamalar fonunda qatılması dayanır. ABŞ lideri Fransaya gəldikdən sonra ABŞ və İran arasında əldə olunduğu bildirilən razılaşmanı əsas diplomatik nailiyyət kimi təqdim edib. Tramp razılaşmanın Hörmüz boğazının açılması və regionda gərginliyin azaldılmasına yönəldiyini bildirib.

G7 liderlərinin görüşündə əsas müzakirə mövzuları arasında Ukraynadakı müharibə, Yaxın Şərqdə vəziyyət, qlobal iqtisadi təhlükəsizlik, Çinlə rəqabət, süni intellekt və beynəlxalq ticarət məsələləri yer alır.

Trampın sammitdə iştirakı bəzi Avropa liderləri ilə fikir ayrılıqları fonunda baş tutur. Xarici media yazır ki, Vaşinqtonun İran siyasəti, Ukrayna məsələsinə yanaşması və ticarət addımları G7 daxilində müzakirələrin gərgin keçməsinə səbəb ola bilər.

Fransa Prezidenti Emmanuel Makronun ev sahibliyi etdiyi görüşdə liderlərin Ukrayna məsələsi üzrə mövqeləri də diqqət mərkəzindədir. Ukrayna Prezidenti Volodimir Zelenskinin də sammit çərçivəsində görüşlər keçirməsi gözlənilir.

Analitiklər hesab edirlər ki, bu ilki G7 sammiti Tramp administrasiyasının xarici siyasət kursunun müttəfiqlərlə münasibətlərə təsirini nümayiş etdirən əsas platformalardan biri olacaq.