2024-cü il noyabrın 29-30-da Almaniyanın Paderborn şəhərində 13-cü Dünya SUDO Çempionatı keçirildi. Bu möhtəşəm tədbir 80-dən çox ölkəni və yüzlərlə iştirakçını bir araya gətirdi. Alman milli yığma komandası ilə yanaşı, Fransanın, Niderlandın, Polşanın, İsveçin, Ukraynanın, Türkiyənin və digər ölkələrin ən güclü komandaları da iştirak etdilər. Çempionat o qədər böyük marağa səbəb oldu ki, onun haqqında məlumatlar bütün dünyaya — qəzetlərdə, internetdə və televiziyada yayıldı.

Bu möhtəşəm Dünya Çempionatında Azərbaycan milli SUDO komandası da Sədi Namazovun rəhbərliyi altında iştirak etdi. O, prestijli Grand Champion kateqoriyasında çıxış edərək bütün rəqiblərini məğlub etdi. Finalda İsveç idmançısı Koroş Dorodsonu məğlub edərək 2024-cü il Dünya SUDO Çempionatının Grand Champion qızıl kəmərini qazandı.

Çempionatın rəhbərliyi, Dünya Federasiyasının Prezidenti, Dr. Ustad Sabir Süleyman tərəfindən həyata keçirildi. Artıq 15 ildir ki, o, federasiyaya rəhbərlik edir və onun rəhbərliyi altında SUDO bütün dünyada yayılmaqdadır. Hazırda Dünya Federasiyasına 90-dan çox ölkə üzvdür. Federasiyanın məqsədi 2025-ci ilin sonuna qədər bu rəqəmi 150 ölkəyə çatdırmaq və 2032-ci ildə Avstraliyada keçiriləcək Olimpiya Oyunlarında ilk dəfə iştirak etmək üçün Beynəlxalq Olimpiya Komitəsinə müraciət etməkdir.

Qeyd etmək lazımdır ki, SUDO — "su" və "dö" sözlərinin birləşməsi olaraq "SU xassələrinə bənzər DÖyüş" mənasını verir. Bu idman növü Sabir Süleyman tərəfindən 2011-ci ildə yaradılıb.

Eyni zamanda, Ustad Sabir Süleyman peşəkar idmançı kimi tanınır. O, öz parlaq karyerasında dörd dəfə dünya çempionu (Milan, Xarkov, Tokio və Bad Kissingendə) və üç dəfə Avropa çempionu (Buxarest, Vaqos və İstanbulda) olub. Sabir Süleyman idman karyerasını 2016-cı ildə Bad Kissengendə keçirilən dünya çempionatında son dəfə çıxış edərək başa vurub. Lakin onun yolunu 17 yaşlı oğlu İbrahim davam etdirir. İbrahim SUDO üzrə bütün çempionatlarda müntəzəm olaraq iştirak edir və hələ ki yalnız qızıl medal qazanır. 2024-cü ildə 13-cü Dünya Çempionatında İbrahim keçən ilki nəticəsini təkrarladı: bütün rəqiblərini məğlub etdi, yarımfinalda Niderland idmançısını, finalda isə Türkiyə təmsilçisini məğlub edərək dünya birincisi oldu.