“Zirə” klubunun baş məşqçisi Rəşad Sadıqov 2018-ci ildə Azərbaycan U-21 yığmasından ayrılmasının pərdəarxası səbəblərini açıqlayıb. O, bu barədə “İdman TV”nin “Sportcast” verilişində danışıb.

Sadıqov bildirib ki, o dövrdə millidən öz istəyi ilə ayrılmayıb: “Mənə zəng edib dedilər ki, istefa ver. Mən özüm yığmadan getməmişəm. Sadəcə maraqlı idi ki, niyə istefamı istəyirlər”.

Təcrübəli məşqçi həmin vaxt komandada perspektivli futbolçuların olduğunu, lakin potensialın reallaşdırıla bilmədiyini də vurğulayıb: “Ondan 20 gün əvvəl oturub danışmışdıq. Qarşıma hədəflər qoyulmuşdu – qrupda ikinci yeri tutmaq istəyirdik. Amma sonra belə oldu. Səbəbini soruşanda tutarsız cavablar verdilər. Onsuz da istənilməyən yerdə qalmaq fikrim olmayıb”.

Sadıqov həmin dövrdə milli komandada böyük potensialın olduğunu, amma əksər gənc oyunçuların itib-batdığını qeyd edib: “O heyətdən yalnız Qurban Qurbanovun rəhbərliyi altında oynayan Elvin Cəfərquliyev, Toral Bayramov, Nəriman Axundzadə və Musa Qurbanlı inkişaf edə bildi. Qalanları yoxa çıxdı. Ən azı 7-8 il itirdik”.

Rəşad Sadıqovun bu açıqlamaları Azərbaycan futbolunda gənc oyunçuların inkişafı və yığma komandada idarəetmə məsələlərinə dair yenidən müzakirələrin başlanmasına səbəb ola bilər.