Şimali Makedoniyanın paytaxtı Skopyedə keçirilən U-17 Avropa çempionatı güləşçilərimiz üçün uğurla başlayıb. Turnirin ilk yarış günündə yunan-Roma güləşi üzrə millimizin beş təmsilçisi xalçaya çıxıb. Onlardan biri – Rihad İbrahimli (110 kq) möhtəşəm çıxışı ilə adını finala yazdırıb.

İbrahimli ilk qarşılaşmasında belaruslu Matvey Silişi 5:1 hesabı ilə məğlub edərək yarışa əzmkar start verib. Ardınca polşalı Mateuş Tomelkanı 11:2 kimi böyük fərqlə üstələyərək yarımfinala yüksəlib. Həlledici görüşə bir addım qalmış ukraynalı Anatoli Novaçenko ilə qarşılaşan Rihad bu dəfə də əzmkar mübarizə göstərərək 4:1 hesablı qələbə ilə final bileti qazanıb.

Rihad İbrahimli sabah baş tutacaq final görüşündə bolqarıstanlı Denis Lazarov ilə qızıl medal uğrunda mübarizə aparacaq.

Digər nəticələr:
• Qurban Məcnunov (48 kq) ilk iki görüşdə Macarıstan və Türkiyə təmsilçilərinə qalib gəlsə də, yarımfinalda erməni rəqibi ilə xalların keyfiyyətinə görə (6:6) məğlub olub. Məcnunov sabah bürünc medal uğrunda Yunanıstandan olan Nikolaos Zinis ilə qarşılaşacaq.
• Nicat Yeylaqaliyev (80 kq) ardıcıl üç parlaq qələbədən sonra yarımfinalda litvalı Benediktas Bubeleviçyusa 1:1 hesablı bərabərliklə, sonuncu xal prinsipinə əsasən uduzub. O da sabah bürünc medal uğrunda döyüşəcək. Rəqibi Serbiya, Latviya və ya İsveç təmsilçilərindən biri olacaq.
• Ayxan Əsədli (55 kq) ilk mərhələdə qalib gəlsə də, 1/4 finalda rusiyalı Danil Lojkinə “tuş”la uduzub.
• Ramil Musayev (65 kq) ilk görüşündə vaxtından əvvəl qələbə qazansa da, 1/8 finalda mübarizəni dayandırıb.