Tarixdə ilk dəfə ABŞ, Kanada və Meksikanın birgə ev sahibliyi etdiyi futbol üzrə dünya çempionatı bu gün başlayır.

Turnirin açılış matçı A qrupunda Meksika və Cənubi Afrika Respublikası yığmaları arasında keçiriləcək. Qarşılaşma Mexikoda yerləşən məşhur “Asteka” stadionunda Bakı vaxtı ilə saat 23:00-da start götürəcək. Oyunu braziliyalı FIFA referisi Vilton Sampayo idarə edəcək.

Bu il mundial ilk dəfə 48 komandanın iştirakı ilə təşkil olunur. Turnirə ümumilikdə 1248 futbolçu sifariş edilib. Kabo-Verde, Kurasao, İordaniya və Özbəkistan yığmaları dünya çempionatında ilk dəfə çıxış edəcək.

Turnir ərzində ümumilikdə 104 oyun keçiriləcək. Onlardan 78-i ABŞ ərazisində baş tutacaq.

Azərbaycanlı azarkeşlərin də maraqla izlədiyi komandalar arasında Türkiyə millisi xüsusilə diqqət çəkir. 24 il sonra yenidən dünya çempionatına vəsiqə qazanan “ay-ulduzlular” D qrupunda mübarizə aparacaq.

Türkiyə millisinin ilk oyunu iyunun 14-də Bakı vaxtı ilə saat 08:00-da Avstraliya yığmasına qarşı olacaq.

Qruplar:

A qrupu: Meksika, Cənubi Afrika Respublikası, Koreya Respublikası, Çexiya
B qrupu: Kanada, Qətər, İsveçrə, Bosniya və Herseqovina
C qrupu: Braziliya, Mərakeş, Haiti, Şotlandiya
D qrupu: ABŞ, Paraqvay, Avstraliya, Türkiyə
E qrupu: Almaniya, Kurasao, Kot d’İvuar, Ekvador
F qrupu: Niderland, Yaponiya, İsveç, Tunis
G qrupu: Belçika, Misir, İran, Yeni Zelandiya
H qrupu: İspaniya, Kabo-Verde, Səudiyyə Ərəbistanı, Uruqvay
I qrupu: Fransa, Seneqal, Norveç, İraq
J qrupu: Argentina, Əlcəzair, Avstriya, İordaniya
K qrupu: Portuqaliya, Konqo Demokratik Respublikası, Özbəkistan, Kolumbiya
L qrupu: İngiltərə, Xorvatiya, Panama, Qana

Turnir iyulun 19-da başa çatacaq. Son dünya çempionu 2022-ci ildə Qətərdə keçirilən turnirin qalibi Argentina millisidir.