Azərbaycan Kosmik Agentliyi “Azərkosmos”un peyk telekommunikasiya xidmətlərinin ixracı 2025-ci ilin yanvar-iyul aylarında 10,1 milyon dollar təşkil edib ki, bu da ötən ilin müvafiq dövrü ilə müqayisədə 7,3 faiz azdır. Həmçinin, xidmət ixracı edilən ölkələrin sayı 48-dən 41-ə düşüb.

İqtisadi İslahatların Təhlili və Kommunikasiya Mərkəzinin “İxrac jurnalı”na görə, “Azərkosmos”un xidmət ixracından əldə etdiyi gəlir ümumi gəlirlərinin 66 faizini təşkil edib. İyul ayında isə 35 ölkəyə 1,6 milyon dollar dəyərində xidmət ixrac olunub ki, bu da iyun ayına nisbətən 6,3 faiz artım deməkdir. Xidmət ixracında əsas tərəfdaşlar Birləşmiş Krallıq, Lüksemburq, Nigeriya, Türkiyə və Misirdir.

2024-cü il üzrə maliyyə hesabatına görə, “Azərkosmos”un ümumi zərəri 379,6 milyon manata çatıb. Qurum ötən ilə nisbətən itkilərini 40,8 faiz azaldıb: 2023-cü ildə zərər 54,45 milyon manat, 2024-cü ildə isə 32,25 milyon manat olub. 2024-cü ildə göstərilən xidmətlərin dəyəri 38,1 milyon manat, gəliri isə 37,7 milyon manat təşkil edib.

Hesabata əsasən, 2013-cü ildən kommersiya fəaliyyətinə başlayan “Azərkosmos” indiyə qədər ümumilikdə 650 milyon manat gəlir əldə edib.