2026-cı ilin yanvar–mart aylarında dünya bazarlarında Azeri Light neftinin 1 barelinin orta ixrac qiyməti 85.11 ABŞ dolları olub.

Hesabat dövründə neftin ən yüksək qiyməti 128.28 dollar, ən aşağı qiyməti isə 64.12 dollar səviyyəsində qeydə alınıb. Azərbaycanın dövlət büdcəsində isə “Azeri Light” neftinin bir barelinin orta qiyməti 65 ABŞ dollarından hesablanıb. Bu isə faktiki qiymətin büdcə proqnozunu əhəmiyyətli dərəcədə üstələdiyini göstərir.

“Azeri Light” neftinin tarixi minimum qiyməti 2020-ci il aprelin 21-də 15.81 dollar, maksimum qiyməti isə 2008-ci ilin iyulunda 149.66 dollar olub.

Azərbaycan Maliyyə Nazirliyinin məlumatına görə, yanvar–mart aylarında dövlət büdcəsinin gəlirləri 9 milyard 599 milyon manat təşkil edib. Bu göstərici proqnozdan 458.9 milyon manat və ya 5 faiz çoxdur.

Müstəqil iqtisadçılar ölkə iqtisadiyyatının neft və qazdan yüksək asılılığını riskli hesab edirlər. Onların sözlərinə görə, ötən il ixrac gəlirlərinin təxminən 85 faizi enerji resurslarının payına düşüb.

Ekspertlər xatırladırlar ki, hökumət 2014–2015-ci illərdə neftin ucuzlaşması dövründə qeyri-neft sektorunun inkişafını prioritet elan etmişdi. Onların fikrincə, neftin müvəqqəti bahalaşması iqtisadiyyatın şaxələndirilməsi ilə bağlı öhdəliklərin arxa plana keçməsinə səbəb olmamalıdır.