Hesablama Palatasının açıqladığı audit hesabatı bir sıra dövlət qurumlarında ciddi maliyyə pozuntuları, qeyri-şəffaf satınalmalar və idarəetmə problemlərini üzə çıxarıb.

Hesabata görə, Azərenerji ASC tərəfindən azad olunmuş ərazilərdə tikilən kiçik su elektrik stansiyalarında (KSES) texniki-iqtisadi əsaslandırmalar aparılmayıb. 255,8 milyon manatdan çox vəsaiti əhatə edən layihələrdə istehsal gücünün cəmi 14,7–46 faizi istifadə olunub, smeta dəyərləri isə sonradan artırılıb. Satınalma prosedurlarında qanun pozuntuları da qeydə alınıb.

Dövlət Gömrük Komitəsi üzrə aparılan audit zamanı isə 37,7 milyon manatlıq şişirdilmiş xərclər aşkarlanıb. Bundan əlavə, bəzi ödənişlərin uçotdan yayındırıldığı, sosial sığorta haqlarının ödənilmədiyi və dövlət vəsaitlərinin düzgün yönəldilmədiyi müəyyən edilib.

Gənclər və İdman Nazirliyinin tabeliyində olan Olimpiya İdman Komplekslərində (OİK) gəlirlərin xərcləri qarşılamadığı, bir çox hallarda isə ümumiyyətlə uçota alınmadığı bildirilib. Komplekslərin əsas maliyyə mənbəyinin dövlət subsidiyaları olduğu qeyd olunub.

Elm və Təhsil Nazirliyinin Təhsil Sisteminin İnformasiyalaşdırılması İdarəsində isə satınalmaların əsaslandırılmadan aparıldığı, milyonlarla manatlıq müqavilələrin texniki sənədlərsiz bağlandığı üzə çıxıb. Həmçinin bəzi hallarda bazar qiymətlərindən baha alışlar edildiyi və hətta 12 ay əvəzinə “13-cü ay” üçün internet xərclərinin ödənildiyi aşkarlanıb.

Bundan başqa, “Avtomobil Yolları” Məqsədli Büdcə Fondu üzrə planlaşdırma və icrada uyğunsuzluqlar qeydə alınıb. Yol təsərrüfatına dəymiş ziyanın tam ödənilməməsi, eləcə də bəzi vəsaitlərin təyinatı üzrə istifadə olunmaması diqqətə çatdırılıb.

Ümumilikdə audit nəticələri dövlət vəsaitlərinin idarə olunmasında şəffaflığın və səmərəliliyin artırılmasına ciddi ehtiyac olduğunu göstərir.