Bu gün – 5 sentyabr 2025-ci il – görkəmli teatr və kino xadimi, Xalq artisti Səyavuş Aslanın anadan olmasının 90 illiyi qeyd olunur.

Səyavuş Məmmədağa oğlu Aslanov (Aslan) 1935-ci il sentyabrın 5-də Bakıda dünyaya göz açıb. Uşaqlıq illərindən dram dərnəklərinə qoşulan sənətkar 1954-cü ildə yaradıcılıq fəaliyyətinə başlayıb. Bir müddət Quba Dövlət Dram Teatrında çalışan aktyor 1959-cu ildə Azərbaycan Dövlət Musiqili Komediya Teatrına qayıdaraq burada onlarca yaddaqalan obraz yaradıb.

Səhnədəki uğurlu çıxışları ilə tamaşaçı rəğbətini qazanan Səyavuş Aslan “Toy kimindir?”, “Kəndimizin mahnısı”, “Özümüz bilərik”, “Hicran”, “Qaçırılmış qız” və digər tamaşalardakı rolları ilə teatr aləmində xüsusi yer tutub. O, uzun illər Musiqili Komediya Teatrının aparıcı aktyorlarından biri olub, 1994–1996-cı illərdə isə həmin teatrın bədii rəhbəri vəzifəsində çalışıb.

Sənətkarın zəngin yaradıcılığı dövlət tərəfindən də yüksək qiymətləndirilib. 1974-cü ildə “Əməkdar artist”, 1982-ci ildə isə “Xalq artisti” fəxri adlarına layiq görülüb. O, həmçinin “Şöhrət” (1995) və “Şərəf” (2013) ordenləri ilə təltif edilib.

Səyavuş Aslan 2013-cü il iyunun 27-də Bakıda vəfat edib və İkinci Fəxri xiyabanda dəfn olunub.

Bu gün aktyorun sənəti və yaratdığı obrazlar Azərbaycan teatr və kino tarixinin dəyərli səhifələri kimi xatırlanır.