İlham Əliyevin sərəncamı ilə Azərbaycanın İraqdakı səfiri Nəsir Natiq oğlu Məmmədov geri çağırılıb.

Nəsir Məmmədov təxminən 2 ay öncə gündəmə gəlmişdi. Araşdırmalar nəticəsində Nəsir Məmmədovun viza alveri etdiyi məlum olmuşdu.

Səfirlikdə hər il viza alverindən milyonlarla vəsait mənimsənildiyi haqqında məlumatlar gəzir.

Viza rüsumu 20 dollar olduğu halda səfirlik saxta “vasitəçi şirkət”in əli ilə vizanı 500 dollara satırmış. İraq səfirliyində il ərzində təxminən 5 min viza verilir, bu da yekunda 2-3 milyon dollar aralığında qara dövriyyə deməkdir.

Milyonlarla dollar dövriyyəsi olan viza dəllallığında səfirlik təkbaşına olmayıb. Prosesdə xarici işlər nazirinin sabiq müavini Nadir Hüseynovun da adı keçir. Onun bu cür qaranlıq işlərdə təcrübəsinin olduğu haqda mediada indiyə kimi çox yazılıb.

Xatırladaq ki, Nadir Hüseynovun adı daha əvvəllərdən viza alverində hallanıb. O, 2020-ci ilin sentyabrında tutduğu vəzifədən uzaqlaşdırılıb.

Mümkündür ki, Nadir Hüseynov da məsuliyyətə cəlb edilsin.

Qeyd edək ki, Nəsir Məmmədov əmək və əhalinin sosial müdafiəsi nazirinin keçmiş müavini Natiq Məmmədovun oğludur.

O, Milli Məclisin Komitə sədri Hicran Hüseynovanın kürəkənidir.