Baş prokurorluq Səhiyyə Nazirliyində araşdırmaya başladı. İki məmuru saxta sertifikatlar verməkdə ittiham olunur

Plastik cərrahiyyə fəaliyyətinə dair saxta sertifikatların verilməsinə görə Səhiyyə Nazirliyinin məmurlarına cinayət işi açılıb. Bu barədə Baş Prokurorluq və Səhiyyə Nazirliyinin 27 dekabr tarixli birgə məlumatında deyilir.

Əsasən, rüşvət alaraq qanunsuz tibbi fəaliyyətə şərait yaradan məmurlar ifşa olunublar.

İstintaqın məlumatına görə, Səhiyyə Nazirliyinin insan resursları, elm və təhsil şöbəsinin müdiri Səidə Rüstəmova nazirliyin İctimai Səhiyyə və İslahatlar Mərkəzinin akkreditasiya şöbəsinin keçmiş müdiri Lətafət Cabbarova və digər şəxslər ilə qabaqcadan əlbir olaraq rüşvət alıb və qanunsuz tibbi fəaliyyətə şərait yaradıb.

Həmin faktlarla bağlı Cinayət Məcəlləsinin 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrarən külli miqdar rüşvət alma), 308.2 (ağır nəticələrə səbəb olmaqla vəzifə səlahiyyətlərindən sui-istifadə) və 313-cü (vəzifə saxtakarlığı) maddələriilə cinayət işi başlanıb.

Səidə Rüstəmova və Lətafət Cabbarovaya qarşı Cinayət Məcəlləsinin müvafiq maddələrilə ittihamlar irəli sürülüb. Binəqədi Rayon Məhkəməsinin qərarı ilə onların barəsində ev dustaqlığı və vəzifədən kənarlaşdırma qətimkan tədbirləri seçilib, məlumatda deyilir.

Xatırladaq ki, son aylar Bakıda ixtisassız həkimlər bir neçə uğursuz plastik əməliyyat (bir ölüm hadisəsi daxil olmaqla) həyata keçiriblər.