ABŞ dövlət katibi Marko Rubio, Milli Təhlükəsizlik müşaviri Mayk Uolts və Orta Şərq üzrə xüsusi nümayəndə Stiv Vitkoff Rusiya-Ukrayna danışıqları üçün Səudiyyə Ərəbistanına getməyə hazırlaşır.

CNN bu barədə məlumat yayıb.

ABŞ prezidenti Donald Tramp bir neçə gün əvvəl Rusiya-Ukrayna müharibəsinin sona çatdırılması məqsədilə danışıqların Səudiyyə Ərəbistanında keçiriləcəyini açıqlamışdı. Müzakirələrin detalları ABŞ mediasına sızıb.

CNN kanalına danışan adının açıqlanmasını istəməyən iki ABŞ rəsmisi Rus nümayəndələrlə görüşmək üçün Rubio, Uolts və Vitkoffun hazırlandığını bildirib. Rəsmilər ilk görüşün yaxın günlərdə baş tutacağını desələr də, dəqiq tarix açıqlanmayıb.

Görüşlərə hansı Rusiya rəsmilərinin qatılacağı hələ bəlli deyil. Lakin CNN-in əvvəlki xəbərlərinə görə, Kremldən yüksək vəzifəli şəxslərin, o cümlədən ABŞ və Rusiya arasında son məhbus mübadiləsi razılaşmasında mühüm rol oynayan Kirill Dmitriyevin də iştirak edəcəyi müzakirə heyətinə daxil olduğu bildirilir.

Qeyd edək ki, Tramp cümə günü verdiyi açıqlamada ABŞ, Rusiya və Ukrayna rəsmilərinin gələn həftə Səudiyyə Ərəbistanında görüş keçirəcəyini demişdi.