"Azərbaycana və Azərbaycan xalqının maraqlarına qarşı kim hansı platformada hansı cinayəti törədibsə, əmin olsun ki, mütləq Azərbaycan qanunları qarşısında cavab verəcək".

Bu sözləri Milli Məclisin deputatı Hikmət Babaoğlu deyib.

"Bir zamanlar Azərbaycan torpaqlarını işğal edən, ona meydan oxuyan terrorçular, separatçılar necə bu gün Azərbaycan xalqının iradəsi qarşısında cavab verirlərsə, virtual məkanda Azərbaycana meydan oxuyan, əslində isə ermənipərəst, islamofob mərkəzlərə xidmət edən ideoloji terrorçular - informasiya terrorçuları də o cür cavab verəcəklər. Onların yaşadıqları ölkələrdən Azərbaycana ekstradisiya edilib- edilməyəcəkləri məsələsinə gəlincə, Azərbaycan güclü, nüfuzlu dövlətdir. Azərbaycan dövlətinin imkanları var ki, onları bu və ya digər formada hüquqa uyğun, hüquqi yollarla, beynəlxalq hüququn tanıdığı imkanlarla Azərbaycana gətirsin. Düşünürəm, Almaniya da, digər ölkələr də mütləq bunu nəzərə almalıdırlar. Fransa isə bu gün öz işləri ilə o qədər məşğuldur ki başqalarına qarşı kibercinayətkarları dəstəkləməyə imkanı belə yoxdur. Buna görə də gec, ya da tez informasiya terrorçuları, virtual terrorçular mütləq Azərbaycan qanunları qarşısında cavab verməli olacaqlar!" - deputat bildirib.

Azərbaycan Respublikası Baş Prokurorluğu xaricdə yaşayan blogerlər Qabil Məmmədov, Qurban Məmmədov, Tural Sadıqlı, İlqar Hacıyev, Elşad Məmmədov və Məhəmməd Mirzəlini prokurorluğun İstintaq İdarəsinə çağırıb.