İranın vitse-prezidenti Şəhram Dəbiri Prezident Məsud Pezeşkian tərəfindən vəzifəsindən qovulub.

Buna səbəb onun Novruz bayramında həyat yoldaşı ilə birlikdə Antarktikaya tətilə getməsi olub.

Aprelin 5-də verdiyi fərmanda Pezeşkian Dəbirinin səfərini “ekstravaqant və müdafiəolunmaz” adlandırıb.

“Birinci şiə İmamın (İmam Əlinin) dəyərlərinə əməl etməyə çalışan bir hökumətdə və xalqımıza əhəmiyyətli iqtisadi təzyiqlər şəraitində dövlət məmurlarının dəbdəbəli səfərləri, hətta şəxsən maliyyələşdirilsə belə, müdafiə olunmazdır”, fərmanda qeyd olunub.

Prezident əlavə edib ki, Dəbirinin “hərəkətləri, xüsusilə iqtisadi çətinliklər zamanı bütün məmurların riayət etməli olduğu "sadə yaşayış" prinsiplərinə ziddir”.

Bundan əvvəl, Dəbirinin həyat yoldaşı ilə Antarktikaya yola düşəcək gəminin önündə çəkdirdiyi şəkil sosial mediada iranlı istifadəçilər arasında çox paylaşılmış və tənqid olunmuşdu.

İran uzun illərdir ki, “HƏMAS” və “Hizbullah” kimi qruplaşmaları dəstəklədiyinə görə Qərbin ciddi sanksiyalarına məruz qalır və iqtisadi cəhətdən təzyiq altındadır.

Beynəlxalq Valyuta Fondunun (BVF) 2024-cü ilin oktyabr ayına olan məlumatına görə, İranda işsizlik səviyyəsi 8,4%, illik inflyasiya isə 29,5% təşkil edib.

Antarktikaya kruiz səfərləri adambaşına 8,000-29,000 ABŞ dolları arasında dəyişir.