Türkiyənin tanınmış geoloqu və elm adamı, professor Celal Şengörün həbs edilməsi ilə bağlı istintaq başladılıb. Türkiyə KİV-nin məlumatına görə, bu tələbin səbəbi onun sosial şəbəkələrdə yayılmış bir videoda türk xalqı ilə bağlı səsləndirdiyi təhqiramiz ifadələrdir.

Sözügedən videoda Celal Şengörün “Mən türk xalqı qədər cahil, türk xalqı qədər əxlaq məfhumundan məhrum bir cəmiyyət tanımadım” dediyi bildirilir. Bu ifadələr cəmiyyətdə geniş rezonans doğurub və ictimai qınağa səbəb olub.

Hadisə ilə bağlı prokurorluq tərəfindən “dövləti, türk xalqını, dövlətin qurum və orqanlarını təhqir etmək” ittihamı ilə cinayət işi açılıb. Hazırlanan ittiham aktında Celal Şengör üçün 2 ilədək azadlıqdan məhrumetmə cəzası tələb olunur.

Məsələ ilə bağlı hələlik professorun özü və ya hüquqşünasları tərəfindən rəsmi açıqlama verilməyib. Hadisə ölkədə söz azadlığı və ifadə sərbəstliyi ilə bağlı müzakirələri yenidən gündəmə gətirib.