Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevə Müstəqillik Günü münasibətilə təbrik məktubu ünvanlayıb.

Təbrikdə Türkiyə lideri Azərbaycan xalqını və dövlət başçısını öz adından və Türkiyə xalqı adından səmimi qəlbdən təbrik edib:

“Hörmətli cənab Prezident, əziz Qardaşım. Can Azərbaycanın Müstəqillik Günü münasibətilə Zati-alinizi və qardaş Azərbaycan xalqını xalqım adından və şəxsən öz adımdan səmimi-qəlbdən təbrik edirəm.”

Ərdoğan qeyd edib ki, Türkiyə hər zaman Azərbaycanla birlikdədir və Azərbaycanın həm regionda, həm də beynəlxalq aləmdə qazandığı uğurlardan qürur duyur:

“Bu əlamətdar bayramın ildönümündə Türkiyə kədərli və sevincli günlərdə hər zaman birlikdə olduğu Can Azərbaycanın həm regionda, həm də onun hüdudlarından kənarda əldə etdiyi nailiyyətlərdən qürur duyur və yüksək səviyyəli əlaqələrimizi ‘Bir millət, iki dövlət’ ruhunda daha da möhkəmləndirmək istiqamətindəki qarşılıqlı iradəmizdən böyük məmnunluq hissi keçiririk.”

Türkiyə Prezidenti məktubunda iki ölkə arasında qardaşlıq və əməkdaşlıq münasibətlərinin ortaq inkişaf hədəflərinə xidmət etdiyini və bu münasibətlərin hər keçən gün daha da gücləndiyini vurğulayıb.

Sonda Ərdoğan Azərbaycan Prezidentinə cansağlığı və xoşbəxtlik, Azərbaycan xalqına isə rifah və firavanlıq arzulayıb.