Bratislava – 14 iyun 2025 – Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib ki, rəsmi Bakı Zəngəzur dəhlizi ilə bağlı Ermənistandan konkret addım atmasını gözləyir.

O, bu barədə Slovakiyanın paytaxtı Bratislavada keçirilən “GLOBSEC 2025” forumu çərçivəsində “Orta Dəhliz: Yeni Geosiyasi və İqtisadi Həyat Xətti” adlı panel müzakirəsində çıxışı zamanı danışıb.

“Ermənistanın irəli sürdüyü ‘sülh kəsişməsi’ təşəbbüsü olduqca məhdud və gecikmiş bir yanaşmadır. Azərbaycan əraziləri işğal altında olarkən biz bağlantı məsələsini münaqişənin həlli prosesinin bir hissəsi kimi müzakirə edirdik. İndi isə münaqişə artıq həll olunub, regionda sabitlik və təhlükəsizlik yaradılıb”, – deyə Hacıyev vurğulayıb.

Prezident köməkçisi qeyd edib ki, hazırda Ermənistanla danışıqlar aparılır və Bakı bu ölkənin regional əməkdaşlıqda iştirakına qarşı deyil: “Ermənistan regional müzakirələrin və əsas nəqliyyat bağlantılarının bir hissəsi ola bilər. Bizim niyyətimiz heç kimi təcrid etmək deyil. Ancaq Ermənistanın da müəyyən öhdəlikləri yerinə yetirməsini gözləyirik”, – deyə o əlavə edib.

Hikmət Hacıyev bildirib ki, Azərbaycan 30 il ərzində Naxçıvanla quru əlaqədən məhrum olub və indi bu vəziyyətin dəyişməsi üçün real addımların atılması zəruridir “Ermənistanda ‘dəhliz’ sözünə qarşı bir qıcıqlanma hiss olunur. Zarafatla deyirəm ki, Azərbaycanın bütün ərazisi dəhliz ola bilər. Amma adını nə istəyirlər, qoysunlar. Əsas məsələ Naxçıvanla quru bağlantının bərpasıdır. Əminəm ki, bu əlaqə qurulduqdan sonra Ermənistan üçün də yeni imkanlar açılacaq. Biz Ermənistanı regional nəqliyyat sisteminin tərkib hissəsi kimi görmək istəyirik”, – deyə Hacıyev qeyd edib.