Nəsimi rayonunda psixotrop maddələrin qanunsuz dövriyyəsi ilə məşğul olan şəxslər ifşa olunub. Bu barədə Daxili İşlər Nazirliyi (DİN) məlumat yayıb.

Nazirliyin açıqlamasına görə, Nəsimi Rayon Polis İdarəsinin əməkdaşları tərəfindən keçirilən əməliyyat zamanı əvvəllər məhkum olunmuş üç nəfər saxlanılıb: 38 yaşlı Murtaza Həsənov, 45 yaşlı Baba Cəfərov və 44 yaşlı Qəzənfər İbrahimov.

Onların üzərindən və yaşadıqları ünvanlardan ümumilikdə 6 kiloqrama yaxın heroin, marixuana, metamfetamin və toz formasında 200 qrama yaxın ekstazi aşkarlanıb. Həmçinin Qəzənfər İbrahimovdan 266 ədəd preqabalin və 37 ədəd ekstazi həbi də götürülüb.

Araşdırmalar zamanı məlum olub ki, saxlanılan şəxslər şəxsiyyətləri istintaqla müəyyənləşdirilən İran vətəndaşları tərəfindən narkokuryerliyə cəlb olunublar. Onlar narkotik vasitələri maddi qazanc müqabilində müxtəlif ünvanlara çatdırmağı planlaşdırıblar.

Faktla bağlı cinayət işləri başlanılıb, araşdırmalar davam edir. Eyni zamanda, saxlanılan şəxslərin daxil olduqları narkoşəbəkənin digər üzvlərinin də müəyyən edilməsi istiqamətində əməliyyat tədbirləri aparılır.

DİN-in məlumatına əsasən, cari ilin əvvəlindən indiyədək Nəsimi rayonu ərazisində ümumilikdə 47 kiloqramdan çox narkotik vasitə qanunsuz dövriyyədən çıxarılıb.

Hadisə ilə bağlı videomaterial DİN tərəfindən ictimaiyyətə təqdim olunub.