İyunun 15-də Azərbaycan Prezidenti İlham Əliyev Koreya Respublikasının ölkəmizdə yeni təyin olunmuş fövqəladə və səlahiyyətli səfiri Kımqu Kanqın etimadnaməsini qəbul edib.

Səfir etimadnaməsini dövlət başçısına təqdim etdikdən sonra tərəflər arasında görüş baş tutub. Prezident İlham Əliyev Azərbaycan ilə Koreya arasında münasibətlərin uğurla inkişaf etdiyini vurğulayaraq, siyasi əlaqələrin yüksək səviyyədə olduğunu və mütəmadi siyasi məsləhətləşmələrin aparıldığını qeyd edib.

Dövlət başçısı iki ölkə arasında iqtisadi və ticarət əlaqələrinin inkişafı üçün geniş potensialın olduğunu bildirib. O, sənayeləşmə və regionların inkişafı proqramları çərçivəsində əməkdaşlıq imkanlarına diqqət çəkib.

Səfir Kımqu Kanq Prezident İlham Əliyev tərəfindən Milli Qurtuluş Günündə qəbul edilməsini böyük şərəf kimi dəyərləndirib. O, Koreya Respublikasının sabiq Prezidenti Ro Mu Hyunun Azərbaycana rəsmi səfərini, eləcə də Prezident İlham Əliyevin Koreyaya dövlət səfərini xatırladaraq, bu səfərlərin münasibətlərə mühüm töhfə verdiyini deyib.

Görüşdə yüksək texnologiyalar, rəqəmsal transformasiya, elm, təhsil, peşə hazırlığı, tibb və digər sahələrdə əməkdaşlıq məsələləri müzakirə olunub. Kımqu Kanq, həmçinin Ələt Azad İqtisadi Zonasının Koreya biznes dairələri üçün maraq doğurduğunu vurğulayıb.

Söhbət zamanı Prezident İlham Əliyev Azərbaycanın siyasəti nəticəsində Cənubi Qafqazda sülh və sabitliyin təmin edildiyini qeyd edib və Koreya yarımadasında da uzunmüddətli sülhün bərqərar olacağına ümidini ifadə edib.