Ermənistanın baş naziri Nikol Paşinyan “Zəngəzur dəhlizi” anlayışının gündəmdə olmadığını, əvəzində “Sülh yollarının kəsişməsi” adlı yeni yanaşmanın təklif olunduğunu bildirib. O, bu fikirləri Türkiyədə erməni icmasının nümayəndələri ilə görüşündə səsləndirib.

“Həm biz, həm də Türkiyə yol istəyirik. Sərhədləri açaq. Biz Avropa İttifaqı ilə münasibətləri normallaşdırmaq istəyirik. Türkiyənin isə Orta Asiya və Çinlə aktiv iqtisadi əlaqələri mövcuddur və bu istiqamətdə kommunikasiya marşrutları inkişaf edir”, – deyə Paşinyan bildirib.

O vurğulayıb ki, “Zəngəzur dəhlizi” anlayışı əvəzində “Sülh yollarının kəsişməsi” gündəmə gətirilir:
“Bu, qarşılıqlı hörmət, yurisdiksiyanın tanınması və suverenliyə əsaslanan yüklərin daşınması deməkdir”.

Baş nazir çıxışı zamanı suyun başında oturan əjdaha ilə bağlı məşhur erməni lətifəsinə də istinad edib və bunun ermənilərdə “Turan” anlayışı ilə bağlı qorxulara bənzədiyini qeyd edib:
“Əjdaha belə su içmək istəyir, qoy içsin, nə problem var? Bu, bizim ermənilərin qorxusuna bənzəyir: deyirlər ki, onların məqsədi ‘Turan’dır. Onlar nə istəyirlər? Ermənistanın ərazisindən keçmək. Yaxşı, gəlsinlər, getsinlər, bu pisdir? Biz bunu ‘Sülh yollarının kəsişməsi’ vasitəsilə təklif edirik”.

Paşinyanın bu çıxışı Ermənistan və regionda nəqliyyat kommunikasiyaları ilə bağlı davam edən müzakirələrin yeni mərhələyə keçə biləcəyinə işarə kimi dəyərləndirilir.