ABŞ-ın nüfuzlu “New York Times” qəzeti iddia edir ki, İranın ali dini lideri Ayətullah Əli Xamenei mümkün sui-qəsd və ya fövqəladə vəziyyət halında ölkənin ali rəhbərliyində keçidin təmin olunması üçün konkret addımlar atıb. Nəşr Tehrandakı mənbələrinə istinadla yazır ki, Xamenei öz yerinə keçmək üçün üç yüksək rütbəli ruhanini namizəd kimi seçib.

Məqalədə qeyd olunur ki, dini lider bununla yanaşı, hərbi komandanlıqda da ehtimal olunan dəyişikliklərə qarşı planlaşdırma aparıb. Belə ki, yüksək rütbəli hərbi rəhbərlərin zərərsizləşdirilməsi halında rəhbərlik silsiləsində kimlərin varis olacağı da müəyyənləşdirilib. Lakin nə dini, nə də hərbi varislərin adları açıqlanmayıb.

“Ölkə hazırda müharibə vəziyyətindədir. Ayətullah Xamenei sürətli və nizamlı keçidi təmin etmək, həmçinin öz ideoloji mirasını qorumaq istəyir,” – deyə qəzet mənbələrinin fikrini sitat gətirib.

Məlumata görə, Xamenei hazırda xüsusi təhlükəsizlik şəraitində, yeraltı bunkerdə gizlənib. O, komandirləri və yaxın çevrəsi ilə birbaşa deyil, etibarlı vasitəçilər vasitəsilə əlaqə saxlayır.

Bundan əvvəl də beynəlxalq mediada Ayətullah Xameneinin çox məxfi, elit təhlükəsizlik bölməsinin müşayiəti ilə ciddi şəkildə mühafizə olunan əraziyə köçürüldüyü barədə xəbərlər yayılmışdı.

Qeyd edək ki, İran regionda artan gərginlik və daxili təzyiqlərlə üz-üzə olduğu bir vaxtda bu cür məlumatların yayılması ölkənin siyasi gələcəyi ilə bağlı sualları daha da artırır.