Bu gecə İsrailin İrana endirdiyi genişmiqyaslı hava zərbələri nəticəsində İranın hərbi və siyasi rəhbərliyindən bir sıra yüksək vəzifəli şəxslərin öldüyü bildirilir.

İran mənbələrinin məlumatına görə, hücum nəticəsində həlak olanlar arasında bunlar var:
• İran Silahlı Qüvvələrinin Baş Qərargah rəisi, general-leytenant Məhəmməd Bageri
• SEPAH-ın (İslam İnqilabı Keşikçiləri Korpusu) yüksək rütbəli generalları Hüseyn Səlami və Qulaməli Rəşid
• Ali dini lider Ayətullah Əli Xameneinin baş müşaviri Əli Şamxani

Məlumatlar hələlik rəsmi şəkildə İran hakimiyyəti tərəfindən rəsmən təsdiqlənməyib, lakin yerli mətbuat və sosial mediada geniş yayılıb.

İsrail: “İran atom bombası hazırlığı ilə bağlı sınaqlar keçirib”

İsrail tərəfi hücumun səbəbi ilə bağlı ilk açıqlamanı verib. İsrail Müdafiə Ordusunun sözçüsü Efi Defrin bildirib ki, İslam Respublikası yaxın günlərdə atom bombası hazırlamaq üçün sınaqlar həyata keçirib:

“Biz ilk dəfə olaraq İranın qısa və sürətli şəkildə nüvə silahı hazırlamasına imkan verəcək sınaqlar keçirdiyini aşkar etdik. Bu, region və dünya üçün qəbulolunmaz təhlükədir,” – deyə Defrin qeyd edib.

İsrailin iddialarına görə, bu sınaqlar nüvə silahının hazırlanması prosesində kritik mərhələ sayılır və hücumun əsas motivlərindən biri də məhz bu təhlükənin aradan qaldırılması olub.

Regionda gərginlik daha da artır

Hadisə bölgəsində vəziyyətin olduqca gərgin olduğu bildirilir. Həm İsrail, həm də İran silahlı qüvvələri yüksək hazırlıq vəziyyətinə gətirilib. Beynəlxalq ictimaiyyət tərəfləri təmkinli olmağa çağırır.