İsrailin müdafiə naziri İsrael Katz İranın Ali Rəhbəri Ayətullah Seyid Əli Xameneiyə qarşı sərt bəyanatla çıxış edib. Nazir Xameneinin “İsrailin məhvi ideyasını bayraq edən diktator” olduğunu bildirib və onun aradan götürülməsinin İsrailin hərbi strategiyasında əsas hədəflərdən biri olduğunu vurğulayıb.

Bu bəyanatı Katz İranın raket zərbələri ilə hədəfə aldığı Holon bölgəsinə səfəri zamanı verib. Yerli mediaya danışan nazir deyib: “İsrailin məhvini əlində bayraq edən Xamenei kimi diktator mövcudluğunu davam etdirə bilməz. O, mövcud olmağa davam edə bilməz”.

İsrael Katz Xameneini “müasir dövrün H*tleri” adlandırıb və əlavə edib ki, onun öldürülməsi İsrailin regional təhlükəsizliyi təmin etmək və İranın nüvə ambisiyalarına son qoymaq üçün həyata keçirdiyi hərbi planların ön sırasındadır.

Nazirin bu bəyanatı İsrail ilə İran arasında gərginliyin daha da dərinləşdiyi bir dövrdə səslənib. Son həftələr ərzində iki ölkə arasında qarşılıqlı hava və raket zərbələri intensivləşib. Tərəflər bir-birini mülki əhalini hədəf almaqda ittiham edir.

İsrail hökuməti bir neçə dəfə bəyan edib ki, İranın nüvə proqramı və Yaxın Şərqdəki silahlı qruplaşmalara dəstəyi ölkə üçün birbaşa təhlükədir. İran isə İsrailin bu kimi açıqlamalarını “təcavüzkar ritorika” adlandıraraq bölgədə sülhə əsas maneə kimi qiymətləndirir.