ABŞ-ın keçmiş, hazırda isə prezidentliyə namizədi Donald Tramp İranın ali rəhbəri Ayətullah Əli Xameneiyə qarşı sərt təhdid səsləndirib.

Tramp sosial şəbəkə hesablarında yazıb: “Ali Lider”in harada olduğunu bilirik. Amma onu hələ ki, öldürməyəcəyik. Xəbərdarlıq edirik: mülki şəxslərə və ya ABŞ əsgərlərinə hücum olmasın. Səbrimiz tükənir. İran qeyd-şərtsiz təslim olmalıdır”.

Trampın bu bəyanatı ABŞ ilə İran arasında gərginliyin pik həddə çatdığı bir vaxta təsadüf edir. Son günlərdə İsrailin İran ərazisinə endirdiyi zərbələr və regionda hərbi aktivliyin artması fonunda, Trampın sözləri həm birbaşa xəbərdarlıq, həm də psixoloji təzyiq vasitəsi kimi qiymətləndirilir.

Qeyd edək ki, bu, Trampın İran rəhbərliyinə qarşı ilk təhdidi deyil. Prezidentliyi dövründə də o, SEPAH-ın Qüds Qüvvələrinin komandanı Qasım Süleymanini Bağdadda dron zərbəsi ilə öldürmək əmri vermişdi.

İran tərəfi hələlik Trampın açıqlamasına rəsmi cavab verməyib. Bununla belə, bəzi müşahidəçilər hesab edir ki, bu cür təhdidlər diplomatik eskalasiyanı daha da artıracaq və bölgədə sabitliyi daha da təhlükəyə atacaq.