İyunun 27-də Azərbaycan Respublikasının Prezidenti İlham Əliyev İran İslam Respublikasının ölkəmizdə yeni təyin olunmuş fövqəladə və səlahiyyətli səfiri Müctəba Dəmirçilunun etimadnaməsini qəbul edib.

Təqdimat mərasimindən sonra dövlət başçısı səfirlə söhbət aparıb. Prezident İlham Əliyev İran Prezidenti Məsud Pezeşkianla dünən baş tutmuş telefon danışığını və onun Azərbaycana səfəri zamanı aparılmış müzakirələri məmnunluqla xatırladıb. Prezident qeyd edib ki, bu səfər iki ölkə arasındakı münasibətlərin inkişafında yeni bir səhifə açıb.

Dövlət başçısı bildirib ki, Prezident Pezeşkianın Bakıya səfəri zamanı səsləndirdiyi bəyanatlar və fikirlər Azərbaycan ictimaiyyəti tərəfindən çox müsbət qarşılanıb.

Söhbət zamanı Prezident İlham Əliyev İranla İsrail arasında baş vermiş qarşıdurma ilə bağlı Azərbaycanın mövqeyini xatırladaraq qeyd edib ki, Azərbaycan bu gərginliyi qınayan və öz münasibətini açıq şəkildə ifadə edən ilk ölkələrdən biri olub. O, qarşıdurma zamanı həlak olan İran vətəndaşları ilə bağlı bir daha başsağlığı verib.

Prezident eyni zamanda bəzi dairələrin və media nümayəndələrinin bu gərginlik fonunda Azərbaycan-İran münasibətlərinə zərbə vurmaq məqsədilə yaydığı şayiələrə də toxunaraq, bu iddiaların tamamilə əsassız və cəfəng olduğunu vurğulayıb.