“DREAM FEST 2025” beynəlxalq musiqi festivalı 23–26 iyul tarixlərində yenilənmiş proqramla baş tutacaq. Bu barədə festivalın təşkilatçısı, Xalq artisti Emin Ağalarov öz İnstaqram səhifəsində məlumat verib.

Ağalarov bildirib ki, Azərbaycan Mədəniyyət Nazirliyinin 29 iyun tarixli rəsmi müraciəti əsasında rusiyalı sənətçilər festival proqramından çıxarılıb.

“Birinci və üçüncü günlərin heyəti demək olar ki, dəyişməz qalacaq. İkinci və dördüncü günlərdə isə yeni ifaçılar təqdim olunacaq. Dünyanın müxtəlif ölkələrindən gələcək ulduz sənətçilərin yenilənmiş siyahısı yaxın günlərdə açıqlanacaq,” – deyə Emin qeyd edib.

O, həmçinin əlavə edib ki, zəruri hallarda biletlərin dəyişdirilməsi və qaytarılması bilet operatorlarının qaydalarına uyğun şəkildə mümkün olacaq.

Xatırlatma:

Azərbaycan Mədəniyyət Nazirliyi Yekaterinburqda azərbaycanlılara qarşı hüquq-mühafizə orqanları tərəfindən etnik zəmində törədilmiş zorakılıq və qətl hadisələri ilə bağlı bəyanat yayaraq, Rusiya ilə mədəni əməkdaşlıq formatında nəzərdə tutulan bütün tədbirlərin – konsert, festival, sərgi və tamaşaların ləğv edildiyini açıqlamışdı.