ABŞ Maliyyə Nazirliyi İran İslam Respublikasına qarşı yeni iqtisadi sanksiyalar tətbiq etdiyini açıqlayıb. Bu barədə məlumat nazirliyin rəsmi veb saytında yayımlanıb.

Yeni sanksiyalar əsasən İran neftinin alınması və daşınmasında iştirak edən qurumlara şamil olunur. ABŞ tərəfi bu fəaliyyətlərin Tehranın regionda və dünyada sabitliyi pozan siyasətlərini maliyyələşdirdiyini bildirir.

Məlumata görə, sanksiya siyahısına daxil edilən təşkilatlar arasında İslam İnqilabı Keşikçiləri Korpusunun (SEPAH) Qüds Qüvvələri ilə əlaqəsi olan qurumlar da yer alır. Vaşinqton bu addımı İranın neft sektorunun qeyri-qanuni maliyyə şəbəkələrinə qarşı mübarizənin tərkib hissəsi kimi qiymətləndirir.

ABŞ Maliyyə Nazirliyi bildirib ki, bu sanksiyalar vasitəsilə İranın regionda “destabilizasiyaedici fəaliyyətlərinin” qarşısını almaq və İran rejiminin gəlirlərini məhdudlaşdırmaq hədəflənir.

Qeyd edək ki, ABŞ administrasiyası son illər ərzində İranın neft ixracatı və maliyyə tranzaksiyaları ilə bağlı dəfələrlə sanksiyalar tətbiq edib. Bu, Vaşinqtonun Tehranla nüvə proqramı, regional siyasət və insan haqları məsələləri üzrə davam edən gərgin münasibətlərinin fonunda baş verir.