İyulun 4-də Xankəndidə Azərbaycan Respublikasının Prezidenti İlham Əliyev Pakistan İslam Respublikasının Baş naziri Məhəmməd Şahbaz Şəriflə görüş keçirib.

Görüş zamanı Pakistanın Baş naziri İqtisadi Əməkdaşlıq Təşkilatının (ECO) 17-ci Zirvə görüşünün yüksək səviyyədə təşkil olunduğunu vurğulayaraq, Azərbaycanın Təşkilatın gücləndirilməsi istiqamətində atdığı addımları yüksək qiymətləndirib. O, həmçinin Azərbaycanla Pakistan arasında mövcud olan qardaşlıq münasibətlərinin daha da inkişaf etdiyini bildirib və bu ilin mayında Laçın şəhərinə etdiyi səfəri, eləcə də Azərbaycan-Türkiyə-Pakistan formatında keçirilən üçtərəfli görüşü məmnuniyyətlə xatırlayıb.

Məhəmməd Şahbaz Şərif Qarabağda, o cümlədən Xankəndidə həyata keçirilən genişmiqyaslı bərpa və quruculuq işlərini təqdirəlayiq hesab edib. O, ikitərəfli münasibətlərin siyasi, iqtisadi, ticarət, sərmayə, enerji və digər sahələrdə uğurla inkişaf etdiyini vurğulayıb.

Prezident İlham Əliyev isə Pakistanın Baş nazirinə dəvəti qəbul edərək Zirvə görüşündə iştirakına görə təşəkkürünü bildirib. Dövlət başçısı həmçinin Laçında keçirilən üçtərəfli görüşü və müzakirələri məmnunluqla xatırlayıb.

Görüşdə Azərbaycan və Pakistan arasında beynəlxalq təşkilatlar çərçivəsində əməkdaşlıq yüksək qiymətləndirilib, regional məsələlər üzrə fikir mübadiləsi aparılıb.