İstanbul Böyükşəhər Bələdiyyəsinin vəzifəsindən azad edilərək həbs olunan sabiq sədri Əkrəm İmamoğluna qarşı “saxta diplom” iddiası ilə aparılan istintaq üzrə ittiham aktı tamamlanıb.

Türkiyə KİV-lərinin məlumatına görə, İstanbul Cümhuriyyət Baş Prokurorluğu tərəfindən hazırlanan ittiham aktında İmamoğlunun diplomunun saxta olduğu iddia olunub. Prokuror onun “rəsmi sənəddə saxtakarlıq” cinayətində iştirak etdiyini irəli sürərək, 8 il 9 ay müddətinə azadlıqdan məhrum edilməsini və siyasi qadağa tətbiq olunmasını tələb edib.

İddialara görə, İmamoğlunun bakalavr diplomunun saxta olması Yüksəköğretim Kurulu (YÖK) tərəfindən hazırlanan hesabatla üzə çıxarılıb. Bu səbəbdən İstanbul Respublika Prokurorluğu “rəsmi sənəddə saxtakarlıq” maddəsi ilə cinayət işi başladıb.

Məlumatda həmçinin qeyd olunub ki, İstanbul Universiteti aralarında İmamoğlunun da olduğu 28 nəfərin diplomunu “saxta olduğu” əsas gətirilərək ya geri götürüb, ya da etibarsız elan edib.

Əkrəm İmamoğlu və tərəfdarları bu iddiaların siyasi motivli olduğunu və qarşıdan gələn seçkilər öncəsi onu siyasi arenadan uzaqlaşdırmaq məqsədi daşıdığını bildirirlər.