Tver, Rusiya – 6 iyul – Rusiyanın Tver vilayətində saxta siqaret və spirtli içkilərin istehsalı və satışı ilə məşğul olmaqda ittiham edilən 8 nəfər azərbaycanlı Federal Təhlükəsizlik Xidməti (FSB) əməkdaşları tərəfindən saxlanılıb. Bu barədə Rusiya KİV-ləri məlumat yayıb.

Məlumata görə, saxlanılan şəxslər uzun müddət ərzində – 2022-ci ilin yanvar ayından 2025-ci ilin iyul ayına qədər – markasız tütün məmulatlarının və spirtli içkilərin qanunsuz dövriyyəsi ilə məşğul olublar.

Təhlükəsizlik xidmətinin keçirdiyi əməliyyat zamanı evlərə basqın təşkil olunub və həmin şəxslər saxlanılıb. Onlardan birinin kimliyi də açıqlanıb – Mustafayev Fərman.

İlkin istintaq materiallarına əsasən, şübhəlilər müxtəlif növ spirtli içkiləri özləri hazırlayaraq, tanınmış brendlərin etiketlərini saxtalaşdırıb, məhsulları orijinal kimi satışa çıxarıblar.

Tver vilayətinin Moskva rayonu üzrə prokurorluğu saxlanılan şəxslər barəsində həbs-qətimkan tədbirinin seçilməsini dəstəkləyib. Nəticədə, 8 nəfərin barəsində məhkəmənin qərarı ilə həbs-qətimkan tədbiri seçilib.

FSB əməliyyatına dair görüntülər də yayımlanıb. Həmin videoda əməliyyat zamanı aparılan axtarışlar və aşkarlanmış saxta məhsullar əks olunur.