Dövlət Təhlükəsizliyi Xidməti (DTX) tərəfindən həyata keçirilmiş əməliyyat nəticəsində Azərbaycandakı müxtəlif ofis və mənzillərdə quraşdırılmış videomüşahidə kameralarına xarici internet resursları üzərindən qanunsuz müdaxilə cəhdlərinin qarşısı alınıb.

Kibertəhlükəsizlik yönümlü əməliyyat-texniki tədbirlər zamanı müəyyən olunub ki, bir sıra şəxslər müşahidə kameralarının idarəetmə qurğularına (DVR) məsafədən icazəsiz qoşularaq şəxsi və ailə həyatına dair məlumatlar əks olunan videogörüntüləri xarici informasiya resurslarına yerləşdiriblər.

DTX bildirir ki, araşdırmalar zamanı həmin görüntülərə real vaxtda baxışı təmin edən istifadəçi hesablarının satışa çıxarıldığı da müəyyən olunub. Bu isə həm şəxsi toxunulmazlıq hüququnun pozulması, həm də kibertəhlükəsizlik baxımından ciddi risklər yaradıb.

Əməliyyat nəticəsində:
• Kibermüdaxiləyə məruz qalmış ünvanlar müəyyənləşdirilib;
• Cihazlara texniki baxış zamanı ümumi təhlükəsizlik boşluğu aşkarlanıb;
• Təhlükəsizlik boşluğunun aradan qaldırılması üçün xarici istehsalçı şirkətə müraciət olunub;
• Qanunsuz şəkildə ələ keçirilmiş və yayımlanmış görüntülər internet resurslarından silinib.

DTX və aidiyyəti dövlət qurumları tərəfindən görülmüş təxirəsalınmaz tədbirlər nəticəsində kibermüdaxilənin fəsadları aradan qaldırılıb və müşahidə sistemlərinin təhlükəsizliyinin artırılması istiqamətində tədbirlər davam etdirilir.