PKK-nın lideri silahlı mübarizənin başa çatdığını açıqladı

Kürdüstan Fəhlə Partiyasının (PKK) həbsdə olan lideri Abdullah Öcalan videomüraciətlə təşkilatın buraxıldığını bəyan edib. Bu, onun 1999-cu ildə Türkiyədə həbs olunmasından sonra ilk dəfə videogörüntü ilə çıxışı olub.

İyulun 11-də yayımlanan müraciət PKK-ya yaxınlığı ilə tanınan Fırat xəbər agentliyi vasitəsilə ictimaiyyətə çatdırılıb. Öcalan çıxışında PKK-nın “varlığın inkarına əsaslanan və ayrıca bir dövlət qurmağı məqsəd qoyan fəaliyyətinə” son verildiyini bildirib.

PKK-nın lideri müraciətində həmçinin bu ilin fevralında səsləndirdiyi “sülh və demokratik cəmiyyətə çağırışa” sadiq qaldığını vurğulayıb:

“Silahların buraxılması mexanizminin qurulması prosesi irəli aparacaq. Bu, silahlı mübarizə mərhələsindən demokratik siyasət və hüquq mərhələsinə könüllü keçiddir. Bu, bir itki deyil, tarixi bir nailiyyətdir.”

Öcalan bildirib ki, silahların buraxılmasına dair detallı mexanizm yaxın günlərdə müəyyən ediləcək və proses qısa zamanda həyata keçiriləcək.

Qeyd edək ki, PKK mayın 12-də rəsmi olaraq özünü ləğv etdiyini və silahlı mübarizəyə son qoyduğunu açıqlamışdı. Bu addım, təşkilatın lideri Abdullah Öcalanın sülh çağırışlarına və 2025-ci ilin martında elan olunmuş birtərəfli atəşkəsə əsaslanaraq atılıb.

Abdullah Öcalan PKK-nı 1978-ci ildə təsis edib. 1984-cü ildən etibarən təşkilat Türkiyəyə qarşı silahlı mübarizəyə başlayıb. İlk dövrlərdə müstəqil kürd dövləti qurmaq məqsədi daşıyan PKK sonradan Türkiyənin cənub-şərqində muxtariyyət və kürdlərin hüquqları uğrunda fəaliyyət göstərib. Bu münaqişə nəticəsində, əksəriyyəti silahlı olmaqla, azı 40 min insan həyatını itirib.

Öcalanın videomüraciəti Türkiyə siyasətində və regionda sülh perspektivləri baxımından mühüm dönüş nöqtəsi kimi qiymətləndirilir.