Azərbaycanda şəxsiyyət vəsiqələrinin forması və üzərindəki məlumatlar yenilənir. Bu barədə iyulun 14-də Milli Məclisdə keçirilən iclasda “Azərbaycan Respublikası vətəndaşının şəxsiyyət vəsiqəsi haqqında” qanuna təklif olunan dəyişikliklərdə əks olunub.

Qanun layihəsindəki dəyişikliklər Beynəlxalq Mülki Aviasiya Təşkilatının (ICAO) standartlarına uyğunlaşdırma və istifadə zamanı yaranan çətinliklərin aradan qaldırılması məqsədi daşıyır.

Yeni şəxsiyyət vəsiqələrində yaşayış yeri və vətəndaşlıq məlumatları əks olunacaq. Əvəzində ailə vəziyyəti, valideynləri, uşaqları, hərbi vəzifəsi və digər şəxsi məlumatlar yalnız İdarələrarası Avtomatlaşdırılmış Məlumat-Axtarış Sistemi (IAMAS) vasitəsilə saxlanılacaq.

Bundan əlavə, vəsiqənin çipində yalnız ən vacib məlumatlar yer alacaq. Digər məlumatlar IAMAS üzərindən kriptoqrafik şəkildə mühafizə ediləcək. Bu, informasiyanın məxfiliyini, bütövlüyünü və icazəsiz müdaxilədən qorunmasını təmin etməyə yönəlib.

Qanun layihəsində vəsiqənin verilməsi və dəyişdirilməsi qaydalarına da yeniliklər edilib. Yaşayış yerinin dəyişməsi artıq şəxsiyyət vəsiqəsinin dəyişdirilməsi üçün əsas sayılacaq. Eyni zamanda, vəsiqədə və ya elektron daşıyıcısında texniki və ya məzmunla bağlı səhv aşkar edilərsə, bu hallarda dövlət rüsumu tutulmadan düzəliş aparılması nəzərdə tutulur.

Qanun layihəsi Milli Məclisdə üçüncü oxunuşda qəbul edilib.