Tanınmış vəkil Adəm Məmmədovun və qardaşı Xəyyam Məmmədovun apellyasiya şikayəti təmin olunmayıb. Bakı Apellyasiya Məhkəməsində keçirilən iclasda birinci instansiya məhkəməsinin çıxardığı hökm qüvvədə saxlanılıb.

Bu barədə məlumatı zərərçəkmiş tərəf – vəkil Ceyhun Yusifovun hüquqi nümayəndəsi Asim Abbasov verib.

Xatırladaq ki, Adəm Məmmədov və Xəyyam Məmmədov birgə rəhbərlik etdikləri onlayn platformada Ceyhun Yusifovu ağır cinayətdə ittiham etmişdilər. Bundan sonra C. Yusifov xüsusi ittiham qaydasında məhkəməyə müraciət edib.

Məhkəmənin qərarına əsasən, Adəm Məmmədov təhqir və böhtan ittihamları ilə 6 ay müddətinə azadlıqdan məhrum olunub. Onun qardaşı Xəyyam Məmmədova isə 9 ay müddətinə islah işləri cəzası verilib.

Bundan əlavə, Vəkillər Kollegiyasının Rəyasət Heyətinin qərarı ilə Adəm Məmmədovun vəkillik fəaliyyəti də dayandırılıb.

Hazırda Adəm Məmmədov cəza müddətini çəkir və onun yenidən azadlığa buraxılması ilə bağlı hüquqi prosesin davam edəcəyi gözlənilmir.