ABŞ Hərbi Hava Qüvvələrinə məxsus C-17 hərbi nəqliyyat təyyarəsinin Avropaya mümkün nüvə silahı daşıması beynəlxalq mediada və siyasi dairələrdə ciddi narahatlıq doğurub. Keçən həftə Nyu-Meksiko ştatındakı Kirtlend hərbi bazasından havaya qalxan təyyarə Böyük Britaniyada yerləşən RAF Leikenhit bazasına enib.

The Times, The Telegraph və The War Zone kimi nüfuzlu nəşrlərin yazdığına görə, Kirtlend bazası ABŞ-ın nüvə bombalarının əsas saxlanma və təlim mərkəzlərindən biridir. Məlumata görə, bu hadisə 2008-ci ildən bəri ilk dəfə ABŞ-ın Avropaya nüvə silahı daşınması ehtimalını gündəmə gətirir.

Hərbi ekspertlər bildirirlər ki, təyyarənin dönüş reysi zamanı radarlarda yenidən görünməsi onun boş uçduğunu göstərir ki, bu da yükün – yəni ehtimal edilən nüvə silahının Britaniyada qaldığına dair şübhələri gücləndirir. NATO-nun keçmiş nüvə silahları üzrə eksperti Uilyam Alberke bu hadisəni “birmənalı nüvə siqnalı” adlandırıb.

Britaniya hökuməti də məsələni təsdiqləyən bəyanatlarla çıxış edib. Hökumət bildirib ki, Soyuq Müharibədən sonra ilk dəfə Kral Hərbi Hava Qüvvələrinə yenidən “nüvə rolu” verilir.

Hadisəyə Moskvanın reaksiyası da gecikməyib. Kremlin sözçüsü Dmitri Peskov TASS-a açıqlamasında deyib:
“Biz gərginliyin artırılması, hərbiləşmə və xüsusilə də nüvə istiqamətində atılan addımları narahatlıqla izləyirik. Aidiyyəti orqanlarımız vəziyyətin inkişafını yaxından müşahidə edir və ölkəmizin təhlükəsizliyini təmin etmək üçün lazımi tədbirləri planlaşdırır.”

Hazırda beynəlxalq müşahidəçilər hadisəni NATO və Rusiya arasında artan gərginliyin yeni mərhələsi kimi qiymətləndirirlər.