Almaniya hökuməti humanitar vizaların verilməsini rəsmi olaraq dayandırıb. Bu barədə iyulun 23-də Almaniya Xarici İşlər Nazirliyinin rəsmi saytında məlumat yayılıb. Lakin qərarın səbəbləri və onun müvəqqəti, yoxsa daimi xarakter daşıdığı barədə ətraflı açıqlama verilməyib.

Qərarın ardınca Almaniya kansleri Fridrix Merts iyulun 18-də verdiyi açıqlamada keçmiş kansler Angela Merkelin dövründə tətbiq olunan miqrasiya siyasətini tənqid edib. O, həmin siyasətin həm Almaniyada, həm də ümumilikdə Avropada miqrasiya böhranına yol açdığını bildirib. Bununla belə, Merts qeyd edib ki, Almaniya əmək bazarının tələbləri çərçivəsində yüksək ixtisaslı mütəxəssislərin ölkəyə qəbuluna açıq qalır.

2025-ci ilin yanvar ayına olan statistikaya görə, Almaniya humanitar viza əsasında 34 700 Əfqanıstan vətəndaşına ölkəyə giriş icazəsi verib. Bundan əlavə, 2017-ci ildən etibarən hər il təxminən 3 000 suriyalı və vətəndaşlığı olmayan şəxs bu mexanizmdən istifadə edərək Almaniyaya yerləşib.

Hazırkı qərar humanitar əsaslarla ölkəyə gəlmək istəyən minlərlə insan üçün qeyri-müəyyən vəziyyət yaradıb. Rəsmi Berlinin yaxın günlərdə bu siyasətin gələcək taleyi ilə bağlı əlavə açıqlama verməsi gözlənilir.