İran Prezidenti Məsud Pezeşkian ölkəsinin şimal-qərbindəki nəqliyyat imkanlarını dəyərləndirərkən Zəngəzur dəhlizinə dolayısıyla dəstək ifadə edib. Bu barədə İran Prezident Administrasiyasının rəsmi saytında yayımlanan çıxışın mətninə əsasən, “Anadolu” agentliyi məlumat yayıb.

Prezident Pezeşkian İran Xarici İşlər Nazirliyinin rəsmiləri ilə keçirdiyi görüşdə qonşu və region ölkələri ilə münasibətlərin strateji əhəmiyyətini vurğulayıb. O, Zəngəzur dəhlizinə istinadən bildirib:

“Qonşularımız və regional ölkələrlə əlaqələrimizi və əməkdaşlığımızı geniş perspektivdən nəzərdən keçirdikdə, ölkənin şimal-qərbindəki sərhəd keçidləri kimi təfərrüatlı məsələlərdən narahat olmağa ehtiyac yoxdur”.

Pezeşkian əlavə edib ki, İran regionda əlaqələrin qarşılıqlı hörmət və iqtisadi inteqrasiya əsasında qurulmasına önəm verir:

“Biz qonşularımızla münasibətlərimizə sərhəd maneələrinin aradan qaldırılması və iqtisadiyyatlarımızı hərtərəfli birləşdirmək çərçivəsində yanaşmalıyıq. Biz həssaslıqları azaltmalı və konstruktiv qarşılıqlı əlaqələrin genişləndirilməsini nəzərdən keçirməliyik”.

Bu mövqe İranın ali siyasi dairələrində fərqli yanaşmaların olduğunu da ortaya qoyur. Belə ki, İran İslam İnqilabı Rəhbərinin baş müşaviri Əli Əkbər Vilayəti Zəngəzur dəhlizinə qarşı sərt çıxışları ilə tanınır. Pezeşkianın çıxışı isə rəsmi Tehranda seçkilə gələn prezident ilə dini rəhbərliyə bağlı qüvvələr arasında bu məsələyə yanaşmada ciddi fikir ayrılıqlarının olduğunu göstərir.

Zəngəzur dəhlizi Cənubi Qafqazda geosiyasi gərginlik yaradan əsas məsələlərdən biri olaraq qalır. Azərbaycan bu layihəni regional iqtisadi əməkdaşlıq üçün əhəmiyyətli hesab edir. İran daxilində isə bu dəhlizin reallaşmasının ölkənin Ermənistanla quru sərhədinə təsiri ilə bağlı narahatlıqlar mövcuddur.