ABŞ Prezidenti Donald Tramp avqustun 8-də Azərbaycan Prezidenti İlham Əliyev və Ermənistanın Baş naziri Nikol Paşinyanla görüşəcək. Bu barədə The Washington Post iki yüksək vəzifəli Ağ Ev rəsmisinə istinadən məlumat yayıb.

Mənbələrdən biri bildirib ki, bu görüş zamanı Azərbaycan və Ermənistan arasında sülh razılaşmasının elan olunması mümkündür. Nəşr vurğulayıb ki, görüşün əsas məqsədi “onilliklərdir davam edən münaqişəyə son qoymaq üçün sülh sazişinin əldə olunmasıdır”.

Verilən məlumata görə, Tramp hər iki liderlə ayrıca görüş keçirəcək. Xatırladaq ki, Əliyev və Paşinyan ötən ay Birləşmiş Ərəb Əmirliklərində görüşsələr də, nəticə etibarilə heç bir razılaşma açıqlanmayıb.

The Washington Post yazır ki, bu təşəbbüs Trampın son aylarda intensivləşdirdiyi sülh diplomatiyasının davamıdır. İyunda Konqo və Ruanda liderləri Trampın vasitəçiliyi ilə Vaşinqtonda sülh sazişi imzalamışdılar. Ardınca Tramp bəyan etmişdi:

“Cəmi bir neçə ay ərzində biz Hindistan və Pakistan, Konqo və Ruanda, eləcə də bir sıra digər ölkələr arasında sülhə nail olduq.”

Nəşr qeyd edir ki, bir çox dünya liderləri Trampın Nobel Sülh Mükafatına namizədliyini irəli sürüblər. “Bu, onların Trampın rəğbətini qazanmağa çalışmaq üçün bir taktikasıdır”, – The Washington Post yazır.