Milli Məclisin deputatı Müşfiq Cəfərov xaricdə yaşayan və barəsində cinayət işi açılan jurnalist və blogerlərlə bağlı açıqlama verib. O bildirib ki, həmin şəxslərin Azərbaycana gətirilməsi qanunvericiliyə uyğun şəkildə həyata keçiriləcək. Deputatın sözlərinə görə, onlar barəsində artıq qiyabi həbs qərarları mövcuddur və dövlətin hüquqi addımları hazırdır.

“Onlar ölkəmizə qarşı düşmən mövqeyi saxlamağa davam edirlər, amma xaricdə aparılan qarayaxma kampaniyaları heç bir nəticə verməyəcək. Azərbaycan güclü dövlətdir, ölkədə sabitlik mövcuddur və xalqla hakimiyyət arasında möhkəm birliyin şahidiyik”, – deyə Cəfərov vurğulayıb.

Deputat əlavə edib ki, Azərbaycanın həm iqtisadi, həm də hərbi baxımdan güclü mövqeyi, eyni zamanda beynəlxalq tərəfdaşlarla sıx əlaqələri mövcuddur. Onun sözlərinə görə, bu şəxslərin hələlik azadlıqda qalması prosesin uzanması demək deyil:

“Əgər bu gün Azərbaycan dövləti bu şəxslərin həbsini tezləşdirmirsə, o demək deyil ki, proses belə də davam edəcək. Onlar azadlıqda olduqları müddətdə dövlətimizə qarşı cinayətlərini artıraraq öz işlərini ağırlaşdırırlar. Tezliklə digərləri kimi qaçıb gizlənənlər də həbs olunacaqlar.”

Müşfiq Cəfərov həmçinin vurğulayıb ki, Azərbaycanda heç kim siyasi baxışına görə məsuliyyətə cəlb edilmir:
“Hər kəs yalnız törətdiyi cinayətə görə cavabdehdir. Hüquqi dövlətin prinsipi budur ki, qanun qarşısında hər kəs bərabərdir.”