İyunun 27-də Azərbaycan Respublikasının Prezidenti İlham Əliyev Sudan Respublikasının yeni təyin olunmuş fövqəladə və səlahiyyətli səfiri Ənəs Eltayeb Elqaylani Mustafanın etimadnaməsini qəbul edib.

Təqdimat mərasimində səfir etimadnaməsini dövlət başçısına təqdim edib. Daha sonra Prezident İlham Əliyev səfirlə görüş keçirərək iki ölkə arasında münasibətlərin mövcud vəziyyəti və inkişaf perspektivləri barədə fikir mübadiləsi aparıb.

Dövlət başçısı Azərbaycan ilə Sudan arasında daim qarşılıqlı dəstəyə əsaslanan münasibətlərin olduğunu qeyd edərək, hər iki ölkənin bir-birinin ərazi bütövlüyü və suverenliyini dəstəklədiyini vurğulayıb. Prezident beynəlxalq təşkilatlar, o cümlədən BMT, İslam Əməkdaşlıq Təşkilatı və Qoşulmama Hərəkatı çərçivəsində əməkdaşlığın uğurla davam etdiyini bildirib.

Prezident İlham Əliyev həmçinin Qoşulmama Hərəkatının Bakıda keçirilmiş Zirvə toplantısı və Antalya Diplomatiya Forumu çərçivəsində Sudanın Suveren Keçid Şurasının Sədri Abdel Fattah Al-Burhan Abdelrahman Al-Burhan ilə keçirdiyi görüşləri məmnunluqla xatırladığını deyib.

Səfir Ənəs Eltayeb Elqaylani Mustafa Sudan rəhbərliyinin salamlarını Prezidentə çatdırıb. Dövlət başçısı salamlara görə təşəkkürünü bildirərək, öz salamlarını da Abdel Fattah Al-Burhana çatdırmağı xahiş edib.

Görüş zamanı səfir Azərbaycanın Sudanın ərazi bütövlüyünə, suverenliyinə və siyasi birliyinə göstərdiyi dəstəyə görə təşəkkürünü ifadə edib. O bildirib ki, ikitərəfli əlaqələrin inkişafı məqsədilə Sudanda xüsusi işçi qrupu yaradılıb.

Səfir, həmçinin, Azərbaycan tərəfindən sudanlı tələbələr üçün ayrılan təhsil təqaüdlərinə görə minnətdarlıq edib və bu təqaüdlərin sayının artırılması xahişi ilə çıxış edib.