Belçika hökuməti BMT Baş Assambleyasında Fələstini dövlət kimi tanıyacağını açıqlayıb. Bu barədə sentyabrın 2-də ölkənin xarici işlər naziri Maksim Prevo məlumat verib.

Nazirin sözlərinə görə, rəsmi tanıma sentyabrda keçiriləcək BMT Baş Assambleyası sessiyasında elan olunacaq və iki əsas şərtlə həyata keçiriləcək:
• Qəzza zolağında saxlanılan bütün israilli girovların azad edilməsi;
• HƏMAS-ın siyasi hakimiyyətdən uzaqlaşdırılması.

Belçika bu addımı Fransa və Səudiyyə Ərəbistanının təşəbbüsü ilə formalaşan “Nyu-York Bəyannaməsi” çərçivəsində atır. Təşəbbüs iki dövlətli həll modelini dəstəkləyir və İsraillə yanaşı sülh şəraitində mövcud olacaq müstəqil Fələstin dövlətinin qurulmasına çağırır.

Eyni zamanda, Brüssel İsrailə qarşı 12 sanksiya paketi tətbiq edəcəyini bəyan edib. Bu tədbirlər sırasında İsrail yaşayış məntəqələrindən gətirilən məhsullara qadağa, israilli şirkətlərlə dövlət satınalmalarının məhdudlaşdırılması və radikal siyasətçilərlə yanaşı HƏMAS rəhbərlərinin Belçikada persona non-qrata elan olunması da var.

Qərar beynəlxalq miqyasda ciddi rezonans doğurub. ABŞ administrasiyası Mahmud Abbasın BMT sammitində iştirakına icazə verilməyəcəyini açıqlayıb. Vaşinqton Fələstinin dövlət kimi tanınmasının yalnız birbaşa İsrail–Fələstin danışıqları nəticəsində mümkün ola biləcəyini bildirir.

Belçika isə mövqeyini dəyişməyəcəyini, həm İsrail hökumətinə, həm də HƏMAS-a qarşı təzyiqi artırmaq niyyətində olduğunu vurğulayıb. Rəsmi Brüssel bu addımı beynəlxalq hüququn qorunması və Qəzzada davam edən humanitar böhrana cavab kimi əsaslandırır.