Sentyabrın 2-də keçirilən məhkəmə iclasında Ermənistanın üçüncü prezidenti Serj Sarkisyan barəsində prokuror tərəfindən mülki iddia irəli sürülüb.

Prokuror məhkəmədən Sarkisyanı və digər şəxsləri mülki cavabdeh kimi tanımağı, həmçinin sabiq prezidentin dövlətin xeyrinə təxminən 4 milyard dram (təqribən 10,2 milyon dollar) məbləğində kompensasiya ödəməsini tələb edib.

İttihama görə, Sarkisyan 20 il əvvəl müdafiə naziri olduğu dövrdə bağladığı saziş nəticəsində Yerevanda İsakov prospektində və “Yerablur” panteonuna yaxın ərazidə yerləşən torpaq sahəsinin bazar qiymətindən aşağı məbləğə satışına şərait yaradıb. Prokurorluq iddia edir ki, torpaq “Toyota-Yerevan” şirkətinə məxsus olması üçün bu addım atılıb. Həmin şirkətin 30%-i Ermənistanın ikinci prezidenti Robert Koçaryanın oğlu Sedrak Koçaryana məxsusdur.

Qeyd edək ki, 2018-ci ildə Ermənistanda Nikol Paşinyan hakimiyyətə gəldikdən sonra keçmiş prezidentlər Robert Koçaryan və Serj Sarkisyana qarşı müxtəlif ittihamlar irəli sürülüb.