Ermənistanın Baş naziri Nikol Paşinyan ölkənin ikinci prezidenti Robert Koçaryanı rüşvətxorluqda ittiham edib və bu barədə çıxışlarında açıq danışacağını bildirib.

Baş nazir qeyd edib ki, Koçaryanın rüşvətxor olması məhkəmə qərarı ilə dolayısı ilə təsdiqlənib:

“Robert Koçaryan iddia müddətinin bitməsinə görə məhkəməyə müraciət edərək işin bağlanmasını istəyib. Bu isə o deməkdir ki, o, faktiki olaraq özünü korrupsiyaya bulaşmış şəxs kimi tanıyıb”.

Paşinyan vurğulayıb ki, hazırda Ermənistan məhkəmə sistemində Koçaryanın korrupsioner olması rəsmi şəkildə qeyd olunub və bundan sonra çıxışlarında bu ifadədən açıq şəkildə istifadə edəcək:

“Qoy məni məhkəməyə versinlər! Amma mən bundan sonra harada Robert Koçaryanın adını çəkirəmsə, deyəcəyəm: rüşvətxor Robert Koçaryan”.

Bu sərt açıqlama Ermənistanın siyasi mühitində yeni gərginlik dalğası yaradıb. Koçaryan və tərəfdarlarının bu bəyanata necə cavab verəcəyi hələlik bilinmir.